PRESENTACIÓN DO NOVO LIBRO DE XOSÉ LUNA

 O vindeiro luns, 1 de decembro, terá lugar no Mome a presentación do libro OBRA POÉTICA, Avelina Valladares Núñez,  do noso veciño Xosé Luna Sanmartín. Colaborarán o Ceip O Foxo e o IES Avelina Valladares no recitado de poemas.Vémonos alí ás 20:00 horas!

Día da Poesía

 O vindeiro xoves 27 de novembro ás 20:00 horas terá lugar no Teatro Principal o Día da Poesía. O noso colexio participará coa recitación de dous poemas por parte de diverso alumnado de Educación Primaria. A entrada é libre.

VIII Mostra de teatro escolar Olimpio Arca Caldas

 

Este  martes vémonos no Teatro Principal ás 18:30 horas para asistir a unha nova edición do certame. Levamos varias semanas traballando na nosa obra Parto da terra. Esperamos vervos alí! A entrada é libre e poden asistir tódalas persoas que o desexen. Vivamos o teatro!

Fala fala falangueira

 

Hoxe recibimos unha carta ben bonita de Matrioshka Teatro. É unha invitación para asistir ao espectáculo escénico que terá lugar no Teatro Principal o sábado 11 de outubro ás 12:30 horas. Vémonos alí!

SINOPSE

O mundo das palabras amosado por dúas actrices que exploran como foron transmitidas de xeración en xeración, de Matrioshka a Matrioshka, que se moven entre a luz da memoria e do esquecemento, unhas usadas dende hai séculos, outras xa esquecidas, e outras recén estreadas, configurando momentos de diversión e reflexión, creando combinacións que abren as portas da curiosidade sobre a historia da nosa lingua entre o público familiar e infantil a partir de 7 anos.

Fala fala falangueira é un espectáculo que nace do amor e respecto á nosa lingua galega.

FICHA ARTÍSTICA

• Dirección e dramaturxia: Gena Baamonde.
• Intérpretes: Chelo do Rejo e Anabell Gago.
• Textos: Gena Baamonde, Chelo do Rejo e Anabell Gago.
• Revisión lingüística: Ana Castro.
• Deseño de vestiario e escenografía: Gena Baamonde.
• Máscara: Lorena Conde.
• Música: Mónica de Nut & Luís Martíns, Virxilio da Silva, Ester García.
• Audios: Galeku, Pablo Chichas, Elba Lozano, Nucha Lorenzo, Jesús Portas, Mara Señoráns e Mª Teresa Fernández.
• Iluminación: Octavio Mas.
• Deseño gráfico: Alba Aller.
• Fotografía e vídeo promocional: Masako Hattori.

SEMENTANDO LINGUA

 Con este título tan ligado á terra  galega e á nosa lingua, damos comezo ás actividades propostas polo EDLG para este curso 2025-26. Partimos do PDI Labregas, que fai alusión ao nomeamento da ONU como Ano da Agricultora.

Dende o inicio dos tempos, o papel da muller en tódolos ámbitos pero especialmente no rural, foi decisivo para o avance da humanidade. Por iso, tamén dende o noso colexio, queremos participar nesta homenaxe á muller galega, que foi pedra angular da sociedade que somos hoxe. Unha gran parte das actividades irán destinadas a que a comunidade educativa e valore o traballo e a valentía da muller rural.

Comezamos, pois...

ILUSTRACIÓNS DE CASTELAO POR PARTE DE 2ºB

 Neste ano tan especial no que conmemoramos a data do seu pasamento, os nenos e nenas de 2ºB  do noso colexio quixeron renderlle esta homenaxe tan bonita. Aquí está o Cousas tan particular deste alumnado:

Que ilustracións tan ben feitas! Parabéns a tod@s!

CELEBRACIÓN DA FESTA DAS PALABRAS

 Aínda resoan nos nosos oídos os cantares e tocares de o Reguereiño de Lamas na Festa das Palabras!

A madriña da festa, Susana Sanches Aríns, animou a esta magnífica canteira de creadores e creadoras literarios a que sigan escribindo en lingua galega.

Os presentadores, antigos alumnos do noso colexio, fixeron un estupendo traballo e fóronnos guiando con xeito e agarimo por esta celebración. 

As encargadas de entregar os agasallos por parte do noso colexio foron as mestras Montse Uzal e Goretti López.

Un ano máis, os gañadores e gañadoras do concurso de Microrrelatos e micropoemas que organiza Dinamizaestrada, subiron ao escenario do Teatro Principal para recoller o seu agasallo: un caravel branco e o libro cos textos elexidos polo xurado de Dinamizaestrada.

Moitas grazas a tod@s pola vosa colaboración e parabéns !